|

Берни Сандерс ерөнхийлөгчийн сонгуульд өрсөлдөнө

АНУ-ын Вермонт муж улсын сенатч Берни Сандерс 2020 оны ерөнхийлөгчийн сонгуульд дахин өрсөлдөнө гэдгээ мягмар гарагт мэдэгджээ.

 

Тэрбээр дэмжигчиддээ илгээсэн захидалдаа, "2016 онд та бид хамтдаа улс төрийн хувьсгал эхлүүлсэн. Одоо бид тэрхүү хувьсгалыг үргэлжлүүлж, хүсэл мөрөөдлөө биелүүлэх цаг нь ирсэн” гэж бичсэн байна.

2016 онд тэрбээр Ардчилсан намын сунгаанд Хиллари Клинтонтой өрсөлдөж, хамгийн сүүлд сунгаанаас нэрээ татаж байсан юм. Түүний мөрийн хөтөлбөрт цалин хөлсний доод хэмжээг нэг цагийн 15 ам.долларт хүргэх, эрүүл мэнд тусламж үйлчилгээг иргэн бүрт хүргэх, коллежийн төлбөрийг үнэгүй болгох, уур амьсгалын өөрчлөлттэй тэмцэх болон чинээлэг америкчуудад ногдуулах татварыг нэмэгдүүлэх зэрэг ажлууд багтсан байсан билээ.

Өдгөө 77 настай Берни Сандерс анх 1990 онд АНУ-ны Төлөөлөгчдийн танхим, 2006 онд Сенатын танхимд тус тус сонгогдож байсан юм. Тэрбээр өнгөрсөн оны завсрын сонгуульд өрсөлдөж, Холбооны улсын сенатчаар гурав дахь удаагаа сонгогдсон билээ.

Үүний зэрэгцээ тэрбээр АНУ-ын Ерөнхийлөгч Дональд Трампыг "худал чалчигч” болон "арьсны өнгөөр ялгаварлагч” хэмээн буруушааж, шүүмжилдэг нэгэн юм.



montsame.mn


 

0 сэтгэгдэл