Архангай /МОНЦАМЭ/. Өнгөрсөн өвөл аймгийн хэмжээнд долоон сум зудтай, долоон сум зудархуу байсан. Олон жилийн дундажтай харьцуулж үзэхэд хур тунадас их биш байжээ. Өнөөдрийн байдлаар аймгийн хэмжээнд 78000 мал хорогдсон байна. Үүний 70 хувийг бог мал, 30 хувийг нь бод мал эзэлж байна. Малын хорогдолд нөлөөлж байгаа хүчин зүйл нь тэжээлийн хангамж дутмаг байгаа явдал гэж аймгийн ХХААГ-ын дарга П.Гомбодорж хэлж байна.Тэрээр цааш нь хэлэхдээ "Өнгөрсөн зун гандуу байсан нь бэлчээрийн ургац тааруу, мал хаваржилтад хүндрэл учруулж байна. Үүнийг даван туулахад тал талдаа анхаарч ажиллаж, үржлийн малаа авч үлдэж, таваарлаг малаа заазалж зах зээлд нийлүүлэх, эх малыг тэжээх, төл авах бэлтгэлээ хангах, малчид малынхаа болон өөрсдийнхөө эрүүл мэнд, хоол хүнсэнд анхаарч ажиллаж байна” гэдгийг онцлон хэлэв.
Одоогийн байдлаар 100 тн хивэг, 10000 боодол өвсийг хаваржилтад зориулж аймгийн нөөцөөс гаргаж, хуваарилахаар бэлтгэж байгаа ажээ.
Б.Гэрэлт-Од
0 сэтгэгдэл