Өвлийн нэг хүйтэн өдөр байсан юмаа 1 сарын аравдын үе. Гадаа 2 ес эхэлчихсэн, яг л хага ташдаг үе байсан юм. Хүн болгон л хурдан хурдан алхаж, аль болох дулаахан газрыг бараадаж байсан орой. Би ч гэрлүүгээ харих гээд л бас л ялгаагүй алхаж явлаа 2 давхар өмдтэй даараад байдаг арай ч дээ. Улаанбаатар минь ч аргагүй Дэлхийн хамгийн хүйтэн нийслэл дээ гэж бахархах ч биш, гутрах ч биш яг л тэгээд явж байтал. Хүмүүс нэг газраас улаан хацартай, баяр хөөртэй нэг л сайхан болчихсон юм шиг гарч ирж байна. Харсан харин "Шөлөндөө" гөөс хүмүүс гарч ирж байна. Нээрээ би чинь өглөө 2 печеньтэй гарснаас хойш юу ч идээгүйгээ, аймшигтай их өлсөж байгаагаа санав. Өө азны юм гээд оров. Хоолоо ч захиалаад утсаа оролдоод хүлээж суутал. Хажууд сууж байсан 2 залуу хоолоо идэж дуусгачихаад жаахан шөлний шавхруу, шарсан банш хэдхэн ширхэгийг орхиод босов. Тэгтэл цаанаас нилээн муухан хувцастай ч, цэвэрч гэмээр үсээ нэг талруу налуулаад самначихсан ах орж ирээд нөгөө 2ын ширээнд, миний хажууд дөхөж ирэв. Шөлрүү 2 секунд гөлрөх мэт харж зогссоноо, гүнзгий санаа алдан эргэж хараад цонх руу дөхөж очоод гараараа "нааш ир" гэсэн шинжтэй даллав. Удаачгүй цаанаас намхан жижигхэн биетэй, сэргэлэн байрын эгч гүйж орж ирээд, өөрт нь харваас томдсон бээлийгээ тайлаад ширээн дээр байгаа хэдэн банш руу сарвайв яг бариад нэгийг нь амандаа хийгээд шөлнөөс 1,2 халбагдаад авав. Тэр үед ах нь миний хажуугийн сандал дээр, зүгээр л тэр эгчийг идэхийг нь хараад сууж байсан. Би тэр хүний нүдэнд ямар их идэх хүсэл байсныг харсан болохоор, идэхгүй байгаад нь бүр гайхаж билээ. Удаачгүй хэдхэн секундын дараа цаанаас ууртай үйлчлэгч, хамгаалагч залуутай цуг яг тэр 2ын зүг чиглэн ирж байна. Нөгөө 2 ч анчин харсан амьтад шиг ухасхийн босов. Залуу нь ирээд "та 2ыг боль гэж хэлээ биз дээ" гэж хэлээд эгчийн урдуур хамгаалах шинжтэй зогсох ахыг хувцаснаас нь зулгаан бариад хаалганы зүг татан авч одов. Ах ч буруу зүйл хийсэндээ гэмших мэт юу ч хэлэлгүй алхалаа. Харин эгч сэргэлэн юм болохоороо үлдсэн 4,5 хан баншийг салганан байж гялс халааслаад. Надруу хараад "Ах, эгчийгээ уучлаарай, садаа болсонд. Сайхан хооллоорой" гэж хэлээд араас нь гарав. Би ч яасан бол гээд цонх руу хартал, гадаа гараад нөгөө эгч халааснаасаа нөгөө баншаа гарган ахын аманд хийж өгхийг би харсан. Тэгэхэд нулимс хацрыг минь дагаад аль хэдийн урсаж байлаа, би ухасхийж босоод нөгөө 2-ыг ороод ир гэж дуудахад тэр 2 аль аль нь итгэл муутай намайг дагаад орж ирсэн юм. Хүмүүс дургүйцдэг гэж хамгаалагч нь хэлсэн болохоор бид 3 доод давхарт нь суун 3н шөл, 1 цуйван, 2 таваг баншыг хамтдаа суун идэхдээ янз бүрийн л зүйл ярьж байлаа. Хэрхэн 90 ээд оны үед бизнес эрхэлдэг байсан, Оросуудаас болж яаж хоосорсон. Хэрхэн хуримаа хийж байснаа ч ярьж өгсөн юм. Хоолны төгсгөлд эгч "миний хань чинь миний анхны хайр байхгүй юу, би үргэлж хажууд нь байнаа гэж амласан юм" гэж хэлээд нүд рүү нь хараад инээхэд л би "ХАЙР ГЭЖ ЮУ ВЭ?" гэдэг асуултын хариг тэр агшинд олсон юм доо.
417 сэтгэгдэл