"Эрдэнэс Монгол” ХХК-ийн удирдлагууд Чилийн Коделко компанийн төлөөлөгчдийг хүлээн авч уулзлаа. Дэлхийд зэсийн үйлдвэрлэлээрээ тэргүүлдэг энэ компанийнхан ”Монголын уул уурхай геологичдын мэргэжлийн институт”-ын урилгаар ирсэн бөгөөд манай улсын уул уурхайн салбарын болон зэс олборлодог компаниудын үйл ажиллагаатай танилцахаар зорин иржээ.
Чили улс Монголын адил байгалийн баялаг ихтэй бөгөөд ДНБ-ийнх нь 30 хувь, нийт экспортынх нь 70 орчим хувь нь байгалийн баялгаас бүрддэг байна. Коделко компанийн захирал ноён Нелсон Пизаррогийн танилцуулснаар Чили улс 15 тэрбум тонн зэсийн, 50 тэрбум тонн зэсийн хүдрийн нөөцтэй ажээ. Коделко компанийн хувьд өдгөө 100 жилийн түүхтэй, 100 хувь төрийн өмчит компани бөгөөд тус компани 18 мянган ажилтантай, жилд 1,8 сая тонн зэс боловсруулж байгаа нь үйлдвэрлэлийн бүтээмж харьцангуй өндөр аж.
Тус компани зэсээс гадна Кали, Кобалт, өөр бусад төрлийн ашигт малтмалыг олборлодог гэнэ. Цаашид зэс олборлолтын чиглэлээр нэмэлт хайгуул хийх, Азийн орнуудтай хамтын ажиллагаа өргөжүүлэх сонирхолтой байгаа ажээ.
Уулзалтын үеэр "Эрдэнэс Монгол” ХХК-ийн Гүйцэтгэх захирал Ц.Түмэнцогт өөрийн болон охин компаниудын үйл ажиллагааг танилцуулж салбарын эрхзүйн орчин сайжирч ил тод хариуцлагатай урт хугацаанд хөгжих боломжтой болж байгааг дуулгасан.
Энэ удаагийн уулзалт хамтын ажиллагааны эхлэл болж байгаад хоёр тал баяртай байгаагаа илэрхийлж, цаашид туршлага солилцон хамтарч ажиллахаар тохиролцлоо..
0 сэтгэгдэл