Шадар сайд, УОК-ын дарга С.Амарсайхан өнөөдөр 21 аймгийн Онцгой комисстой цахимаар хуралдлаа. Цахим хуралд Архангай аймгийн Засаг дарга бөгөөд Онцгой комиссын дарга Д.Золжаргал болон Онцгой комиссын гишүүд оролцож, "Ковид-19" халдварын одоогийн нөхцөл байдал, авч хэрэгжүүлж буй арга хэмжээний талаар танилцууллаа.
Мөн УОК-оор шийдвэрлүүлэх тулгамдаж буй асуудлыг уламжиллаа. Үүнд, халдвар хамгааллын нэг удаагийн хувцас хэрэглэл, түргэвчилсэн оношлуур, вакцины дараагийн ээлжийн татан авалтыг яаравчлах шаардлагатай байгаа тухай дурдав. Мөн сургууль, цэцэрлэгүүдийн үдийн цай хоолны зардлыг шилжүүлж, "Ковид-19" халдварын хариу арга хэмжээнд заоцуулах асуудлыг шийдэж өгөхийг хүслээ.
Улмаар онцгой нөхцөлд ажиллаж буй эрүүл мэнд, ОБГ, Цагдаагийн газрын алба хаагч нарын илүү цагийн урамшууллыг олгох, цас их хэмжээгээр орсноос зарим суманд хаваржилт хүндэрсэн тул малын хивэг тэжээл хөнгөлөлттэй олгож өгөх зэрэг хүсэлтүүдийг тавив. Архангай аймаг нь баруун аймгууд руу дамжин өнгөрөх ганц зам нь болдог онцлогтой. Энэ ч утгаараа коронавирусний халдвар зөөвөрлөгдөн ирж байгаа тул 5-р сарын 8-наас хот хооронд зорчих хөдөлгөөн нээхгүй байх саналыг гаргав.
Шадар сайд, УОК-ын дарга С.Амарсайхан тулгамдсан асуудал, санал хүсэлтийг хүлээн авч, ойрын хугацаанд шийдвэрлэж хариу өгөхөө мэдэгдсэн байна.
0 сэтгэгдэл