УИХ-ын даргын захирамжаар байгуулагдсан ажлын хэсгээс ноолуурын үнийн асуудалтай холбоотой тогтоолын төслийг боловсруулан Засгийн газарт хүргүүлж байгаагаа мэдэгдлээ. Уг тогтоолын төсөлд ноолуур бэлтгэх үндэсний үйлдвэрлэгчдэд хөнгөлөлттэй зээл олгох, экспортыг дэмжих зорилгоор бүх хилийн боомтоор ноолуурыг саадгүй нэвтрүүлэх, ноолуурын суурь үнэ дээр нэг кг тутамд 20 мянга төгрөг нэмж тооцон малчин өрх бүрт олгох зэрэг асуудлыг тусгажээ.
Энэ талаар УИХ-ын гишүүн Ж.Мөнхбат "МУ-ын Их Хурлын даргын захирамжаар байгуулагдсан Л.Элдэв-Очир гишүүнээр ахлуулсан УИХ-ын ажлын хэсэг ЗГ-т хүргүүлэх саналаа өгч байна. Өнөөдөр Засгийн газар ноолуурын асуудлыг өөрийнхөө бодлого чиглэлийн хүрээнд хэрхэн зохион байгуулж байгаа та бүхэн мэдэж байгаа. Бидний зүгээс 300000 гаруй мянган малчдынхаа энэ орлогыг дэмжих, хөдөлмөрийн эрх ашгийг хамгаалахын тулд уг төслийг ЗГ-т санал авахуулахаар хүргүүлж байгаа юм. Үүнтэй холбогдуулан Ч.Улаан сайд өнгөрсөн долоо хоногт мэдэгдсэн мэдээлэлд залруулга хийе гэж бодлоо. Архангай аймаг хэзээ ноолуур 100 000 төгрөг хүрч байсан юм бэ? гэсэн. Тэгвэл өнгөрсөн Мягмар гарагт ХХААХҮЯ-ны газрын дарга Батхүү, ХАА-н биржийн захирал Баатар нарын гаргаж өгсөн 2017-2019 оны ноолуурын бэлтгэлийн дундаж үнийн талаарх судалгааг өгсөн. Жишээлбэл, Архангай аймагт сүүлийн хоёр жилийн хугацаанд 102 000, 120 000 төгрөгөөрийн дундаж үнэтэй байжээ. Ийм хариуцлагагүй мэдээлэл хийж болохгүй шүү гэдгийг залруулан хэлж байна. Иймд 300 000 малчдын эрх ашиг, амьжиргааных нь орлогыг дэмжих төрийн бодлого ажил хэрэг болж байна. Ч.Улаан сайд Архангай аймгийн малчдаас уучлалт гуйх хэрэгтэй" гэв.
0 сэтгэгдэл