Улс төрийн золиос болсон С.Зориг агсны үхлээр Ц.Нямдорж өөрийгөө сурталчлахгүй ээ!

Монгол Улсын Хууль Зүй, Дотоод Хэргийн Сайд, УИХ-ын гишүүн Ц.Нямдорж Төрийн ордонд өчигдөр сэтгүүлчдэд мэдээлэл өгсөн. Ингэхдээ "Хэргийн захиалагчийг ялтан Ц.Амгаланбаатар мөрдөн байцаалт болон шүүх хурлын шатанд яриад л байсан юм билээ. Хэн хэний нэрийг хэлсэн гэдгийг хуулийнхан бүгд мэдэж байгаа. Захиалагч гээд хүний нэр хэлсээр байтал нүүрэлдүүлэлгүй шүүх хурлаар тасалсан” гэсэн.

Улс төрийн аллагын захиалагчийг зарлахгүй нуухаас гадна хэргийн цорын ганц гэрчийг өдий хүртэл дарамталж байгааг ч Ц.Нямдорж мэдэгдэл хийх үеэрээ хэлсэн. "Мөн надад мэдрэгдэж байгаа нэг зүйл бол энэ асуудалтай холбоотой хүмүүс Б.Булганыг дарамтлах ажиллагааг өнөөдрийг хүртэл хийж байгаа" гэж хэлсэн нь хачирхалтай.

Монгол Улсын Хууль Зүй, Дотоод Хэргийн Сайд, УИХ-ын гишүүн Ц.Нямдорж та үнэхээр энэ бүх зүйлийг мэдэж байгаа бол өдий хүртэл яагаад таг чиг байснаа тайлбарлаач. Мөн олон нийтэд ийм хүмүүс энэ хэргийн ард ял завшин үлдээд зогсохгүй гэрчийг ингэж дарамталсаар өдий хүрлээ гээд хэлчихэж яагаад болдоггүй юм бэ? Үгүй бол төрийн ордны индрээс С.Зориг агсны цаг бусын үхлээр попрох шаардлагагүй санагдана. Энэ хүн амины хэрэг Монголын гурван сая иргэний хүлээлт дор илэрэлгүй өдгөө 20 жилийн нүүрийг үзсэн улс төрийн аллага болохоос биш таны улс төрийн попролын өчүүхэн нэг хэсэг байж боломгүй санагдана.

Эх сурвалж: BOLOD.MN

М.МАРТ