"Хүмүүс ээ, надад урам хайрла
Хүсэл зориг бадраах халуун дулаан үгээ хайрла” гэж манай нэрт яруу найрагч Т.Очирхүү нэгэн цагт шүлэглэсэн нь бий. Ер нь ч "Хүн гэдэг урмын амьтан юм” гэж монголчууд зүгээр нэг ярилцдаггүй, харин ч түүний цаана мундаг том философи агуулдаг гэдэгт би итгэдэг. Азай буурал эмээдээ цайны сүү дөхүүлснийх нь төлөө "Миний хүү ч тусад орж дээ, гялайлаа” гэж хэлсэн ганц өгүүлбэр хэдэн бор жаалын хөлийг хөнгөлснийг хэн ч таашгүй. Анхны цалингаа аваад дээжийг нь аавдаа барихад нь "Том эр болжээ, миний хүү” хэмээн урам хайрласан үг хэчнээн залуугийн сэтгэлийг сэргээж, ажил хөдөлмөрийн ямархан амжилт бүтээл рүү хөтөлснийг бид мэдэхгүй. Гэхдээ л итгэл зүтгэлд дагуулсан үгийн үнэ цэнэ, хүний сэтгэлийг мартахын аргагүй ээ.
Ахуйгаасаа ангижирч, улс орны хэмжээний асуудалд анхаарал хандуулбал, саяхан 100 хоногоо үдсэн У.Хүрэлсүхийн Засгийн газрын тухайд цөөн зүйлийг хэлмээр байгаа юм. Энэ хугацаанд эдийн засгийн параметр үзүүлэлтүүд олон талаар өсөлттэй гарсныг гадаад, дотоод хүчин зүйлийн эерэг нөлөө гэж үзсзн ч ОУВС-тай хийсэн яриа хэлэлцээрийн явцад цөөнгүй амлалтын нөхцөлийг зөөллөж, олон нийтэд хамааралтай нэг бус асуудлыг нааштайгаар шийдвэрлэж чаджээ. Тийм атал сөрөг хүчнийхэн бүх юмыг харлуулж, сонгогч түмнийг жагсаал цуглаанд уриалан дуудаж байх юм.
Түүгээр ч зогсохгүй экс Засгийн газрын гишүүд өөрсдөө зовлонг нь дайрч, амсаагүй юм шиг аяглаж байгаа нь өөрсдийг нь төдийгүй МАН-ыг муухай харагдуулж байна. Түүний оронд Ерөнхий сайд асан болон Сангийн сайдаар ажиллаж байсан эрхэм гишүүд "Бидний эхлүүлсэн ажлыг үр дүнд хүргэж байгаад талархаж байна” гээд хэлчихсэн бол илүү таатай байх байлаа. Одоо ажиллаж буй Ерөнхий сайд, Засгийн газрын гишүүдэд ч урам зориг нэмэх байсан гэдэгт огтхон ч эргэлзэхгүй байна. Тэд ч бас хүн шүү дээ. Эцсийн эцэст, бид цөмөөрөө урмын "амьтан” билээ.
Д.Мөнх
Эх сурвалж: "Монголын үнэн" сонин
0 сэтгэгдэл