МҮОХ-ны удирдлагын сонгууль газар, эрх мэдлийн төлөөх тэмцэл болох уу?

Үзэл бодлын зөрүү гэгчийн тайлбар доор, улс төрийн бялуу хүртээлт бидний амьдралд өдөр-шөнө мэт ээлжилсээр, өглөө-орой мэт үргэлжилсээр. Атаа хорсол, амлалт, цөхрөлт түүнийг даган даган хорвоогийн хоногийг хороосоор.

Спортын салбар нь өөрийн гэсэн бичил "вант улс” маягаар оршиж, аливаа гадны нөлөөллөөс хэт хамааралгүй явсан үе бий. Харамсалтай нь манай орныг наймдахь жилдээ ерөнхийлж байгаа Элбэгдоржийн лүндэнгээр тэр түүх 2012 онд мөхсөн гэдэг. Тэрвээр бүхий л дээд түвшинд АН төр барьж эхэлсэн учраас Монголын бүх салбарт эзлэн дийлье гэж журмын нөхдөө хөөргөн турхиржээ. Энэхүү лүндэн яам тамгаас эхлээд аймаг хотоор улбаалж, сум сууринд хүрч сүүлдээ хэсэг, гудамжаар үргэлжлэв. Айл өрх рүү ордгийн даваан дээр "алдарт мэдэгдэл” хийн зогсоосон билээ.

Тэрхүү давалгаанд Монголын олимпийн хороог тухайн үед прокурор байсан, малын эмч мэргэжилтэй Дорлигжавд оноосны дагуу МҮОХ-ны ерөнхийлөгчийн сонгуульд нэр дэвшсэн байна. Тэнд хүслээ гүйцээх ямар ч боломжгүй болсныг ойлгомогц өөрийг нь гомдоогч Загдсүрэнг өргөстэй торны цаана суулган тавлажээ. Хүчний байгууллага, хууль шүүх хэний командаар явах нь тодорхой. Шалгаж шалгаж цаад хүнээ ял зэмгүйгээр гаргачихаж болохгүй, ёс төдий шийтгэл тохоогоод буцааж ажилд нь тавилаа. Малын эмч До хүний эмч За-гаас ийнхүү даагаа нэхсэн гэдэг.

Энэ хооронд "улсын хаан” Элбэг аманд орсон шар тосыг хэлээрээ түлхэхийг хүсээгүй. Хэдэн нүүдлийн цаадахыг харсан нь лавтай. Өөрийнх нь зангаагаар хоригдсон Загдсүрэнг өөртөө үнэнч нэгэн болгож ашиглана. Дорой намуухан түүнийг байтугай бүхэл бүтэн 3 сая хүнийг аргалдаг хойно. Загдсүрэнгийн хэдий насных нь үйл юм, түүнийг боорлох хүмүүс ч мундахгүй. Овоо босгоогүй бол шаазгай хаанаас суух билээ. Олон улсын олимпийн хороонд очих их хүслийг нь дуулмагцаа даамын гэх Батэрдэнэ, оюутны гэх Жаргалсайхан тэргүүтэн хөдөлгөөнчид ноцож гарлаа. Олон улс, Ази, Антарктидаас авахуулаад өмнө хойд хөрш Хятад, Орос, арлын Гуам, мөсний Гринланд руу ч матаас шидэж, Монголын 21 аймаг, Улаанбаатарын 9 дүүргийн шүүхэд дахин дахин зарга үүсгэв. Спортынхон дундаа муу нэртэй хүмүүс үүнийг ярьдаг болохоос зөв зүйтэй санал сэдэв тэдний заргын дунд харагддаг гэлцэнэ.

Хоорондоо нийлдэггүй ч холдож салдаггүй улс төрийнхний, улс төрчдийн үнэн худлыг нь хэн ч олдоггүй мэтгэлцээн, маргалдаан Монголын спортод ийн гаарлаа. Хөдөлгөөнчдийн төлбөр тооцоог томоохон банк хариуцсан яриа ч дуулддаг. Цалин пүнлүүгүйгээр хэн ч ажиллахгүй. Ганхаж хазайсан бэлээхэн албан тушаал (суудал) хэн бүхний шуналыг бадраана. Хорхойг хүргэнэ. Эхлүүлээд орхисноо гүйцээх хүсэлтнүүд, өөрийгөө л ухаант мэргэн гэж бодогчид, өнөө маргаашаа өнгөрөөгчдөөс эхлээд урьд цагт нэгэн зорилгын төлөө явсан хүмүүс нь хүртэл түүнийг хүсэв.

Тэр ч бүү хэл хэдэн үеэрээ МАН-ыг дагаж завшчихаад Элбэгдоржийн хатгаасаар өөрийн намын нэр дэвшигч Бат-Эрдэнэ дархан аваргыг "зайлчихдаг” Мөнх-Очирт байх л асуудал. Өнөөдөр л болж байхад маргааш хамаагүй. Маргааш нэг арга олно доо. Буурлаас үлдээсэн буянг цацаж үрчихээд дараагийн алхмаа эрэлхийлж яваа ч юм бил үү.

Мэдээж Загдсүрэн дахиад хэдэн жил суудлаа хадгалахыг хүсчээ. Хүн хэлэхээс, цаас чичихээс наашгүй гэдэг. Өөрийгөө хэн ч хэзээ ч бүрэн таньдаггүй. Чадалгүй болчихсон хэрнээ чадна даа хэмээн хөмхий зуух нь хүний ертөнцийн жам. Өчигдөрхөн ул долоож явсан нөхөр өдгөө туг булаацалдвал хэн ч дургүйцэх нь мэдээж. Үзнэ ээ.

Дээрээ суудлаа олдоггүй, доороо ч гүйдлээ мэддэггүй Монголын улс төр ингэн ингэн Монголын спортыг эрүүдэн тамлаж байна. Нам бүрээс үүрэг өгч элч томилохоо шахлаа. Дундаас нь олз хонжоо хайгчдыг ч тодруулан таниуллаа. Хэзээ энэ дарамтаас ангижрахыг хэн ч хэлж мэдэхгүй.

Энэ их амбиц, шунал тачаалын цаад зорилго юу вэ? Хүн хүний хүсэл өөр байж болох ч хотын төвийн А бүс дэх газрынх нь төлөө өлөн нүдтэй улс төрчид хэмлэлцээд яваа нь нууц биш. Бейсбол, теннис, байт харваа, хөлбөмбөгийн талбай зэрэг Олимпийн хорооны мэдлийн олон арван га газарт эзэн сууж, хөрөнгөө арвижуулахын төлөө л сонгуульд үзэх гээд байгаа бололтой.

/Иргэний захидал/